Behar batek edo besteak eragindako eskekoen desfile etengabea izaten da pasarela ezin atonduagoan. Bihozberatzeko-edo, kaleak eta bazterrak dotore janzten dizkigute, estetika ezagun/onartu bat nagusitzen zaigu, nahitaez. Poziktibity (pozik+positivity+activity) ekimenaren eran aurkezten digute, argitsu, koloretsu, baikor, jai giroan... Jarrera aldarazteko proposamen errespetagarria bezain lotsabakoa.
Bestalde, gizartean ditugun arazoak direla-eta, inoiz baino elkartuago ari garela dirudi, bai arlo eta helburu batzuetan, behintzat: ugarituz doaz eztabaida foroak, gogoetarako guneak, auzolanerako eta proiektuei laguntzeko deiak… Bolada txarrari aurre egiteko ekimen solidarioak ere nonahi ikus ditzakegu. Krisiaren onurak; betiko bitez!
Iruzkina: 2015ean Eusko Jaurlaritzak 6,6 milioi euro gastatuko ditu langile publikoak euskalduntzeko. Euskararen Legea 1982an onartu zen; lehen plangintza 1990-1995 epealdian egin zen honako helburuagaz: “Administrazioko langileak arian-arian gaitzea, bi hizkuntza ofizialetan jarduteko”. Krisiaren hanturak?