Ordainetan jasotzen denerako sakrifizio handiegia dela uste baduzu, begiratu zaleen aurpegira tropela joan den une horretan, eta ez dela horrela konturatu zara. Aurpegi alaiak ikusiko dituzu. Hurrengoan ere hantxe izango direla adierazten duten aurpegiak dira. Eta tartean umeak badaude, nekez ahaztuko dute berrehun ziklista ziztu-bizian metro gutxira igarotzen ikusteak eragiten duen zirrara. Eta ikuskizuna oraindino handiagoa da ziklistak mendatean gora bizikletan makur-makur eginda ikustean. Euren sufrimenduaren parekoa da zaleen gozamena. Ni munduko txapelketa askotan egon naiz, eta, nonhai nagoela ere, ikurrinak ikusi ditut beti.
Futbolak, saskibaloiak eta beste kirol askok ikuskizun luzeagoa eskainiko dute, baina ez hobea, inondik inora. Horietako askotan sarrera ordaindu behar da gainera, baina ziklismoa doako ikuskizuna da. Txirrindularitzak zale fidelak ditu, eurei esker gabiltza gu errepidean, eta errekonozimendua merezi dute. Txirrindularitza maite dugunok harro egoteko moduan gaude dugun afizioarekin. Seguru nago hemendik urte askotara ere horrela izango dela. Bizikletak aldatuko dira, baita lehiatzeko modua eta taktika ere, baina barruan eragiten duen zirrarak hor jarraituko du.