Usainak eta zaporeak

Erabiltzailearen aurpegia

Bizi garen mundu globalizatuan, elikadura-industria handiei esker, munduko ia edozein tokitako frutak eta barazkiak kontsumitu ditzakegu edozein sasoitan. Hala ere,  argi daukagu ingurumen-kostuak handitzen diren bitartean, kalitatea, zaporea eta mantenugaiak jaisten direla. Batzuetan, denbora faltagatik, erosotasunagatik eta behar dugun guztia leku baten eskura daukagulako, saltoki handietan egiten ditugu erosketak. Ez dut ukatuko ni ere supermerkatuetara joaten naizela.

Baina ahal dudan guztietan, baserritarren azokara edo Durangoko kontsumo kooperatibara joaten naiz, batez ere barazkiak eta fruta erostera. Espazio horiek oso sentsazio atseginak sortzen dizkidate. Alde batetik, erosle-saltzaileen marmarra eta auzokideen arteko topaketa kasualak, esperientziak partekatuz, eta, bestetik, elikagai freskoen eta sasoiko elikagaien usainen nahasketa (eta zaporeak nire buruan ere bai).

Eta, batez ere, hiru arrazoirengatik egiten dut:

Lehena, jendearen ustearen kontra, sasoiko produktuak merkeagoak izaten direlako, banaketa zuzena delako, garraio- eta biltegiratze-kostuak murriztuz.

Bigarrena, tokiko ekoizle txikiei eta tokiko ekonomia eta garapenari laguntzeko neurria delako.

Eta hirugarrena, ingurumenari mesede egiten diolako. Produktuak modu jasangarrian landatzen dira, eta garraio-distantziak askoz txikiagoak direnez, emisioak murrizten dira.

Eta emisioen murrizketei buruz ari garela, eta 2021ean mugikortasun murriztuarekin jarraituko dugunez, tokiko eta sasoiko produktuak kontsumitzera animatzen zaituztegu, horretarako ez baitugu herritik irten behar.

Durangaldeko albiste garrantzitsuak eta azken ordukoak Whatsapp edo Telegram bitartez jaso gura dituzu? Hauek dira bi aukerak.

WHATSAPP: Bidali ALTA 688 635 041 telefono zenbakira.

TELEGRAM: Batu zaitez @anbotokomunikabideak kanalera.