Zer dago kirol lorpenen atzean

Erabiltzailearen aurpegia

Banekien kirol mundua, batez ere dirurik ematen ez duen kiroletan, ez zela batere erraza. Izan ere, ikuslegoak mugitzen duen dirua inbertitzen da kirolariengan, eta egia da ezin dela konparatu futbolak, txirrindularitzak edo tenisak ematen duten dirua, atletismoarekin. Baina, zer da benetan honen atzean ezkutatzen dena? Zer da atleta profesional bat izatea?

Askotan galdetu didate ea atletismotik bizitzea posible den. Beti erantzuten dut, emaitzak lortzen dituzun bitartean, diru laguntzekin eta irabazten den diruarekin posible dela momentuan bizitzea. Baina, nola? Izan ere, irabazten dugun diru apur hori entrenatu eta konpetitu ahal izateko inbertitzen dugu, eta, batez ere, kontuan izan behar da maila hori galtzen dugunean diru laguntza guztiak galtzen ditugula. Hau da, gure errendimenduaren menpe dagoela dena, lesioak edo osasun arazoak kontuan izan gabe.

Esaterako, zapatilak, arropa, suplementazioa askotan gure poltsikotik ordaindu behar izaten ditugu. Adibidez, azkenaldian, marka onak egin ahal izateko lasterketetara nire kabuz egin behar izan ditut  bidaiak, eta benetan atleta “profesionala” izateak zer suposatzen duen konturatu naiz.

Maila altu batera iristen ez bazara, ez daukazu atletismora dedikatzeko errekurtsorik, eta aldiz, lanean hasi eta bizitzeko dirua lortzen hasten bazara, ez daukazu atletismoan maila hobetu ahal izateko denborarik.

Beraz, zer da atleta profesional bat izatea? Nik, Espainian mailarik gorenean dagoen klub batekoa izanik, eta estatuko atleta onenen artean egonda, ez nuke jakingo esaten kirolari profesional bat bezala bizitzeko adina baliabide dudan.

ANBOTOKIDE izatea gure komunitatearen parte izatea da, euskararen erabilera sustatzea eta herrigintzaren aktibazioan pausoak ematea.


EGIN ZAITEZ KIDE!