Baina badirudi ez dagoela denentzako lekurik Durangoko tabernetan. Oso zaila da terrazetatik aulki elektriko batekin edo gurpil-aulkiekin ibiltzea. Ez da egoten lekurik pasatzeko edo maniobratzeko. Eta zer esanik ez espaloiaren mailan ez dauden tabernetan, ez baitaude egokituta.
Bien bitartean, mundu guztia primeran pasatzen egoten da pintxopotean, bermut orduan edo dena delakoan. Maila edo eskaileratxoaren arazoa konponduta ere, hauxe hurrengo arazoa: hanka borobildunek edaria eskatu behar dute barran. Berez, derrigorra da barraren alde bat gurpil-aulkien altueran egotea, baina oso leku gutxitan betetzen da hori.
Eta, jakina, jan eta edan ondoren, komunerako bidea ere hartu behar da sarritan, gorputzak hala eskatzen baitu. Halako tabernetan, lan nekeza gurpil-aulkian dabilenarentzat. Eta askotan, ezinezkoa.
Labur esanda, pertsona guztiok ditugu eskubide berberak teorian, baina mugikortasun urria baduzu zure eskubideak ez dira garrantzitsuak eta ezin duzu gozatu besteek gozatzen duten bezala Durangoko tabernetan.