Lineako mendi lasterketa

Euskal Mendi Federazioaren lineako mendi lasterketen koparen formatu berriaren arrakastaz hitz egin nahiko nuke gaurkoan. 2018 eta 2019. urteetan modalitate anitzeko hogei mendi lasterketez osatutako egutegia zen “ranking” baten aldeko apustua egin ondoren, aurten aspaldiko kopa formatua berreskuratzeko hautua egin zuen EMFk. Hainbeste lasterketa elkartzen zituen egutegi baten, lasterkariak sakabanatu egiten ziren, askotan asteburu berean lasterketa bat baino gehiago elkartzen zirelako. Aurtengo kopa honek bost lasterketa biltzen ditu eta sailkatzeko, gutxienez, lau lasterketa bukatu beharko ditugu kopa hau lehiatu nahi dugun korrikalariok. Esan beharra dago, momentuz, lineako lasterketekin soilik egin dutela kopa hau eta pena da ultra eta bertikalen kopak ez egotea 2018a baino lehenago egiten zen bezala. Espero dut datozen denboraldietan txapelketez gain, kopa formatuak ere egotea mendi lasterketen hiru espezialitate nagusietan. 

Azpimarratzekoa da EMF kopako lehen bi probetan egon den kirol maila, kategoria guztietan. Martxoaren 19an jokatutako Bediako Kolaziñon Oihana Azkorbebeitia eta Asier Larruzea izan ziren txapeldunak. Apirilaren 2an bigarren proba egin zen Mendaroko Kilimon Trail lasterketan eta kirol ikuskizun apartaz gozatu ahal izan genuen hemen ere. Onditz Iturberen nagusitasun nabarmena agerian geratu zen beste behin senior mailako emakumeen kategorian. Itzela da igorreztarra lortzen ari dena astez aste. Mutilen kategorian, aldiz, ikusgarria izan zen lehen lau mutilak sprintean sartzea herrian. Bi orduko esfortzuaren ostean, lehen lau mutilak minutu eskaseko aldeaz helmugaratzea ez da ia sekula gertatzen mendi lasterketetan. Javi Goitiak eraman zuen txapela azkenean, eta bere atzetik helmugaratu ziren I. Goñi, A. Larruzea eta A. Kjaerevik norvegiarra.

Hurrengo kopako proba ekainean izango da. Bien bitartean, beste lasterketez adi egongo gara. Etzi, adibidez, Arrasate-Udalatx lasterketa izango da.

ANBOTOKIDE izatea gure komunitatearen parte izatea da, euskararen erabilera sustatzea eta herrigintzaren aktibazioan pausoak ematea.


EGIN ZAITEZ KIDE!