Gasteizko Mendiak

Mendian korrika egiten hasi nintzenean, distantzia luzeko probei beldurra nielako hasi nintzen 2014an kilometro bertikaletan lehiatzen: desnibel gogorrak bai, baina distantzia laburrak ziren eta nire burua lasaitzeko modu bat-edo izango zen akaso. Geroztik, 10 eta 15 kilometro arteko mendi lasterketa ugari egin ditut eta ikaragarri gustatzen zaizkit horrelako proba labur eta azkarrak. Baina beti nahi izan dut maratoi erdietan aritu. Beraz, pixkanaka, kilometro gehiago eginez, jada 20-30 km arteko mendi lasterketetan indartsu sentitzen hasi naiz.

Orain distantzia luzeei beldurrik ez, errespetua diet; eta ultrak egiten dituztenei miresmen itzela. Ultrak edo, bestela esanda, 42 km baino gehiagoko lasterketak ganoraz prestatzeko, denbora asko behar da eta entrenamenduak progresiboki gogortzen joatea. Hilero ordu eta kilometro gehiago pilatzen joanez prestatzen dira horrelako proba luzeak eta, gainera, elikadura eta beste bizi ohitura asko zainduz.

Zapatuan, Gasteizko Mendiak deritzon 62 kilometroko lasterketa dago. Helmugan sartzen diren lehen 100 lagunek Hiru Haundietarako dortsala irabaziko dute. Guztira, 1.100 lagun inguru irtengo dira bihar goizeko seietan, eta, tartean, lagun bat. Bere ingurukook badakigu mimo handiz prestatu duela lasterketa hau, oso ondo egin baitu prestaketa lan osoa eta lasterketaz gozatzea baino ez zaio geratzen. Animo, Eneritz!

Durangaldeko albiste garrantzitsuak edo azken ordukoak whatsapp bitartez jaso gura dituzu? Bidali ALTA 688 635 041 telefono zenbakira.