Bitañon bizi den Marili Urkizak azaldu duenez, auzotarrik gehienek sinatu dute eskaera, eta udaletxean aurkeztu dute. Udalak, bere aldetik, Bizkaiko Foru Aldundira bideratu ditu sinadurak eta eskaera, harek baitu horretarako eskumena. Udal arduradunen esanetan, herriko ehiza elkarteari ere helarazi diote dokumentua, jakitun egon daitezen.
Goizean goizetik ehiztarien tiroek ateratzen duten zarata, horrek bizilagunei ez ezik etxeko abereei eragiten dien estresa eta, orokorrean, baserrien ondoan ehiza gune bat izateak eragin ditzakeen arriskuak aipatu ditu, besteak beste, Urkizak ehiza gunea kentzeko eskaera arrazoitzeko. Gainera, gogoratu du aurtengo abuztutik Izurtzan martxan dauden Nordic Walking ibilbideetariko bat handik ingurutik igarotzen dela eta bide horretatik dabiltzan oinezkoak ere arrisku taldearen barruan sartzen direla. Oraingoa ez da Bizkaiko Foru Aldundira jo duten lehenengo aldia, baina oraingoan, eskaerari auzotarren sinadurak gehituta, eragin handiagoa izatea itxaroten dute.
Aurretik beste bide batzuk ere urratu dituzte. Esaterako, iaz Arartekora jo zuten, baina bide horretatik ere ez dute aurrerapausorik lortu oraingoz.