Azken hiru legegintzaldietan zinegotzi eta 2024ko martxotik alkate izan den Oskar Koka
izango da Iurretako EAJren hautagaia datorren urtean izango diren udal hauteskundeetan. EAJk Kokaren ibilbidea goraipatu du, "udalerriaren ezagutza eta udalaren eguneroko kudeaketan duen inplikazioa azpimarratuz". Gehiengo osoz aukeratu dute.
Iurretako EAJk azpimarratu du bere hautagaitzak “egonkortasuna, esperientzia eta kudeaketa-gaitasuna” islatzen dituela, "egindako lana sendotzeko eta udalerriaren etorkizuneko erronkei aurre egiteko funtsezko elementua". Koka alkate izanda, "iurretarren bizi-kalitatea hobetzeko ekimen ugari" bultzatu direla adierazi dute. "Etxegoko zerbitzuak hobetu eta ordutegia zabaldu da, Bidebarrietako oinezkoentzako lanak amaitu dira do udalerrian bizikidetza eta mugikortasuna bultzatzeko hainbat proiektu abiatu dira", zehaztu dutenez.
Aurrera begira, "funtsezko gaietan" aurrera egiten jarraitzea du helburu Kokak. "Etxebizitza eskuratzean, irisgarritasuna hobetzean, gazteei laguntzean (Gaztegunean, esaterako) eta kultura-programazioa indartzean" lan egin gura du. “Bide-orri argi batekin ari gara lanean, herritar guztiei entzutean eta haien beharrei erantzutean oinarrituta. Iurreta irisgarriagoa, dinamikoagoa eta guztiontzako aukerak dituena eraikitzen jarraitu nahi dugu”, adierazi du.
Oskar Koka analista programatzailea da eta 1993tik Euskal Irrati Telebistan ari da lanean teknologian teknikari aditu gisa. Bere berbetan, “harro egoteko modukoa da EAJren konfiantza izatea proiektu honen buru izateko. Ilusioz eta arduraz ekingo diot etapa berri
honi, etorkizuneko proiektua garatzen jarraitzeko eta iurretarrentzat eta iurretarrentzat hurbiltasunetik lan egiteko”.