Arialde Zaldien Raid lasterketa jokatuko da Iurretako San Marko auzoan, apirilaren 5ean. Euskal Autonomi Erkidegoko eta Kantabriako federatutako 20-30 zaldik parte hartuko dute bertan, Ariane Isasi zaldizko iurretarrak jakitera eman duenez. Aurten lehenengoz antolatu dute lasterketa eta Euskal Hipika Federazioaren sailkapen-proben egutegian finkatzea dute helburu, Isasik nabarmendu duenez.
Lau kategoriatan lehiatuko dira zaldiak (20 km, 40km, 60km eta 80km), San Marko auzoan prestatutako zirkuitoan. Arialde hipikatik Gallandara joango dira, eta handik Laixiarko zelaira jeitsiko dira. Bertan zenbait buelta eman ondoren, Arialde hipikara bueltatuko dira. Kategoria horiek guztiak ibilbide luzeko lasterketetara (100 km, 120 km edo 160 km) iritsi aurretik zaldizkoak eta zaldiak sailkatzeko derrigorrezko proben parte dira. "Zapaturako antolatutako sailkapen-proba guztiek abiadura kontrolatua dute: gutxienez 9 kilometro orduko abiadura hartu behar dute zaldiek eta gehienez 15 kilometro ordukoa. Normalean zaldi gazteak dira, lasterketetara ohitu egin behar dira, ikasi egin behar dute", argitu du Isasik.
Lehenengoak irtetzen 80 kilometro egingo dituzten zaldi eta zaldizkoak izango dira. Hiru fasetan jardungo dute, 09:00etan irtenda. Jarraian, 60 kilometro egingo dituzten irtengo dira, eta, gero, 40 kilometro egingo dutenak; azkenak, 20 kilometro egingo dituztenak izango dira. "Parte hartzaile bakoitzak bere mailan lehiatuko du. Batzuk abiadura libreko proba nagusiagoetan lehiatzea dute helburu, eta, beste batzuek nahikoa dute sailkapen-probetan jardutea. Bakoitzak bere helburuak ditu, maratoietan moduan", azaldu du zaldiko iurretarrak. "Zaldi bat lehiatzen hasten denean, urtebete egon behar da sailkapen-probetan, ondoren aukera du abiadura librean lehiatzeko. Iurretara etorriko direnen artean badaude entrenatzen ari direnak, 120 kilometroko kategorian parte hartzeko, edo lehenengoz 40 kilometroko mailan parte hartuko dutenak. Badaude dibertitzea dutenak helburu, beste helburu handiagorik gabe", argitu duenez.
Endurance edo Raid disziplina ezagutaraztea ere badute helburu Arialde Zaldien Raid lasterketako antolatzaileek . "Europako txapeldunak gara zaldi lasterketen disziplina honetan, eta mundu mailan ere gorenean gaude. Baina, loropen horiek ez dute oihartzunik. Euskal Herriko zaldizkoak maila oso maila altuan lehiatzen garen arren, ez dauka inolako ikusgaitasunik. Jauzi-lasterketak baino ez dira ezagutzen, beste hainbat disziplina dauden arren", nabarmendu du Isasik. Lasterketa antolatzeko herriko hainbat enpresen laguntza izan dute.