Artista Mundialak. Izenburu horregaz antolatuko dituzte udako tailerrak Iurretan, aurten. Ekainaren 30etik uztailaren 18ra bitartean garatuko dira, eta "artea bere forma guztietan" izango da jorratuko duten gaia. "Haurrak benetako artista bihurtzera, askatasunez adieraztera eta sormenak mugarik ez duen espazio batetaz gozatzera" gonbidatu gura dituzte udal arduradunek azaldu dutenez. HHko 3. mailatik DBHko 2. mailara arteko neska-mutilei zuzendutako ekintzak antolatuko dituzte, adinaren araberako taldeak eginez. Gaurtik eta apirilaren 11ra bitartean eman daiteke izena, HAZn edo Ibarretxe kultur etxean (asteka eman daiteke izena).
Udalekuen bitartean, herriko ume eta gaztetxoei "aisialdirako alternatiba" bat eskaini gura zaie, "modu hezigarrian, haientzako "aberasgarriak" diren ekintzak antolatuz. Udalekuak herrigunean garatuko dira, eskola publikoaren lokaletan, argitu dutenez. "Sormena pizteko eta adierazpen artistikoa sustatzeko" diseinatutako jarduerak, 09:00etatik 14:30era bitartean garatuko dira.