Mariasun Landaren obra ezagutzeko gonbita

"Iurretako herriak, bere bibliotekaren begietatik, zenbait lore ikusten ditu. Lore koloretsuak dira, basatiak, zein baino zein eder eta ezberdinagoak. Lore horietariko asko landa batean hazten dira, Mariasunenean, bere askatasun sortzailean, bere begiradaren izpigorrian, bizitzarekiko bere lotura berezian". Iurretako Herri Bibliotekak berba horiekin eman du Mariasun Landa idazlearenganako esker oneko literatur jardunaldien berri. Urtarrilerako hainbat ekitaldi prestatu dute Landak haur eta gazte literaturan egindako lana ezagutarazteko eta egileari eskerrak emateko. Besteak beste, idazleak berak solasaldia egingo du, Peru Magdalenak gidatuta. Urtarrilaren 23an izango da, 18:30ean.

Bibliotekak ohiko egitaraua egokituko du Mariasun Landaren ondare literarioa ezagutarazteko eta idazlearen "emankortasun literarioa" jaso duten liburuengaitik eskerrak emateko. Landaren liburuak, haren "irakurzaletasunaren defentsa" eta "duintasun askea" nabarmendu dituzte. "Denok dugu krokodilo bat ohe azpian, eta beste zenbait mamu lagun. Horiei guztiei maitasunez begiratzen erakutsi diguzu. Ez da gutxi gurearen moduko herri txiki batentzat", esan dute. 

Zazpi idazle
Iurretako bibliotekak 2017an antolatu zuen esker oneko lehenengo literatur jardunaldia. Orduan, Joseba Sarrionandiaren lana aitortu eta eskertu zuen bibliotekak. Harrezkero, Gloria Fuertes, Leire Bilbao, Astrid Lindgren, Joxeantonio Ormazabal eta Lewis Carroll idazleen lana ezagutzeko aukera eskaini dute.