Iurretako Maiztegi eskolan 54 eguzki-modulu jarriko dira, zentroaren eraginkortasun energetikoa hobetzeko

Anboto 2022ko urr. 25a, 12:38

Iurretako Udalak Maiztegi eskolako estalkia ordezkatzeko eta panel fotovoltaikoak jartzeko lanak hasi ditu. Eraginkortasun energetikoa hobetzeko lanotan 227.000 milioi euro inbertiduko dituzte, eta lau hilabetean amaitzea aurreikusi dute.

Maiztegi eskolaren eraikinaren sarrera nagusiko estalki nagusia eta ataripea (teilak, gailurra, limak...) ordezkatuko dira, udal arduradunek azaldu dutenez. Obra horiekin batera, estalkia iragaizteko eta euri-urak husteko elementuak ordezkatzeko lanak ere egingo dira.

Bestalde, zentroa hornitzeko energia elektrikoa sortzeko, panel foltovoltaikoen instalazio osoa egingo da, eguzkitik datorren energia kontsumorako energia elektriko bihurtzeko. "Maiztegin 54 eguzki-modulu jarriko dira, inolako motorrik edo alternadorerik gabe eta hondakinik sortu gabe, energia elektrikoa sortzeko eguzki-argia erabiliko dutenak", zehaztu dutenez.  

Iñaki Totorikaguena alkateak ohar batean azaldu duenez, "instalazio honekin Maiztegiko eskari elektrikoaren %36 beteko da, sarearen hornidura nabarmen murriztuz eta urtean 4,7 tona CO2 isurtzea saiheztuz.Gainera,estalkia berrizteak energia eraginkortasuna ere hobetuko du”. Lanek 227.000 euroko aurrekontua dute.

ANBOTOKIDE izatea gure komunitatearen parte izatea da, euskararen erabilera sustatzea eta herrigintzaren aktibazioan pausoak ematea.


EGIN ZAITEZ KIDE!