Euskaltzaindiak jakinarazi duenez, Joseba Sarrionandiak euskaltzain urgazlearen diploma jaso du gaur; izendatu zutenetik 30 urtera. 1991ko urtarrilaren 31n izendatu zuten urgazle, baina orain arte ez du diploma jasotzeko modurik izan. Diplomaz gainera, Andres Urrutia euskaltzainburuak liburu-sorta bat ere oparitu dio Sarrionandiari.
Astelehenean, idazle iurretarra Euskaltzaindiaren egoitzara bueltatuko da. Bertako areto nagusira. Bilbo Zaharra euskaltegiak Ramon Saizarbitoria idazlearen Martutene eleberriari buruzko jardunaldia antolatu du, eta bertan izango da Sarrionandia, Pilar Kaltzadagaz eta Aingeru Epaltzagaz batera. Jardunaldia arratsaldeko 19:00etan egingo dute.