Donostiako Unai Gaztelumendi eta Beñat Gaztelumendi anaiek Bidea da borroka komikia aurkeztuko dute eguen honetan, Iurretako Abadetxean. Komikia Bertsolari aldizkariaren enkarguz egin dute, eta bertan jaso dituzte Martin Artola izeneko bertsolariaren gorabeherak eta burutazioak. Pertsonaiak autoa hartzen duenetik Barakaldon jokatzekoa duen Euskal Herriko Txapelketa Nagusira arteko bidea jaso dute komikian. Beñat Gaztelumendi arduratu da gidoiaz eta Unai Gaztelumendi irudiez.
Abadetxean egingo duten aurkezpenean, anaia biek zuzeneko bertsoak eta bat-bateko ilustrazioak eskainiko dituzte. Bertsolari aldizkariko iturriek adierazi dute, gutxi gorabehera, ordubete inguruko saioa izango dela. Emanaldia eguenean izango da, arratsaldeko 19:00ean.