Iurretarrek sare sozialen bitartez eta www.iurreta.eus webgunearen bitartez bozkatu ahal izango dute. Baita etxeetara helaraziko duten liburuxkaren bitartez ere. Liburuxka horiek Herritarren Arreta Zerbitzurako bulegoaren inguruan eta herriko hainbat tokitan jarritako postontzietan utzi daitezke. Ekainaren 24an, informazioa emateko karpa jarriko da Dantzari auzunean eta bertan ere utzi ahal izango da botoa.
Boto gehien batzen dituzten hiru proiektuak gauzatzeko 50.000 euroko diru-atala gorde du Iurretako Udalak. Honako zortzi proiektuen artean bozkatu daiteke:
- Zaldaiko bideko argiak hobetzea eta oinezkoentzako bazterbideak seinaleztatzea. Iurretaburu-Etxetxu baserrietarako bidean argiteria jartzea (Iturburu auzoa).
- Haurrentzako jolasak berritzea Berezin.
- Gabonetako dekorazioa jartzea Bidebarrieta inguruan.
- Hirigunean komun publiko bat jartzea.
- Baserrietako seinaleak berritzea.
- Goiuria auzoan iturri publiko bat instalatzea.
- Bolatokian rokodromoa jartzea.
- Kalistenia-parke bat sortzea.