Iurretako Udalak 9 led kale-argi berri jarriko ditu San Andres auzoan, orain daudenak ordezkatzeko. Baserrietarako sarbideetan eta ermitaren inguruan jarriko dituzte eta maila programagarri bi izango dituzte. Hartara, gutxien erabiltzen diren orduetan kontsumoa erdira jaistea ahalbidetzen dute, udal arduradunek azaldu dutenez. Hiru hillabete beharko dira lanak amaitzeko eta, guztira, 47.615 euroko inbertsioa aurreikusi dute.
Udalak "landa-auzoetako oinarrizko azpiegiturak hobetzeko, energia aurrezteko eta ingurumena hobetzeko konpromisoari jarraituz" erabaki du , landa-eremuetan led teknologiako argiteria eraginkorra jartzea, "iraunkortasunarekiko konpromisoarekin bat eginez", ohar batean azaldu dutenez. Aurreko urteetan udalerriko hainbat eremutan jarri dituzte led argiak.