Oinezkoendako ibilbide berria dute iurretarrek, Ibarretxe kultur etxetik eskola-guneraino doana. Haurreskolara eta Etxegora joateko aukera ere ematen du ibilbide berriak. Irisgarritasuna bermatu gura du 133 metro inguru dituen arrapala berriak, eta sigi-sagan doa Haurreskolaraino; ibilbideak %6 malda du. Zuhaiztiak eta eserlekuak jarri dira ibilbidean zehar.
Iñaki Totorikaguena alkateak azaldu duenez, "irisgarritasuna hobetzeaz batera, inguruan paisai-efektu positiboa lortu gura izan dugu, eta herrigunea eta eskola- eta kirol-guneak lotuko dituen pasiorako gune bat sortu". Dozena bat zuhaitz landatu dira trazaduran zehar dauden ezpondetan, gaineratu duenez. Era berean, lehendik zeudenak mantendu dira. Hiri-altzariak apirilaren erdialdean jartzea aurreikusi dute, "pasealekuaz osotasunean gozatu ahal izateko".