Iurretan Laixiar irrati librea sortu dute Abadetxearen aterpean

Iurretako hainbat gaztek Laixiar irrati librea ipini dute martxan, Abadetxeak ateak zabaldu ondoren piztutako ilusioak bultzatuta. Ondo pasatzea dute helburu nagusia, Ander Duñabeitiak eta Aimar Legorburuk azaldu dutenez. “Laixiar lagunarteko irratia da. Lagun artean hasi zen, eta horrela jarraitzen dugu. Ondo pasatzea dugu helburu. Umoretik abiatuta, gure intereseko kontuak landu gura ditugu, Iurretakoak batez ere, eta Durangaldekoak ere bai”, esan dute. Bosgarren irratsaioa aireratu dute, podcast formatuan, eta maiztasuna finkatzea dute epe laburrerako erronka nagusia.

Barikuro Laixiartzen magazina prestatu eta sareratu gura dute. “Era berean, bestelako saio berriak sortzen joango gara, ahal dugun neurrian. Izan ere, ez dugu baliabide eta denbora askorik, eta osasun egoerak zuzenean eragin digu", argitu du Duñabeitiak. Etorkizunari begira, antena bat lortu eta uhinen bitartez emititzea da Laixiar irratiaren erronkarik handiena.

Abadetxearen aterpean
Laixiar irratiak hamar bat laguneko lantaldea du atzean. "Etxeetan grabatu genituen lehenengo saioak. Orain, Abadetxean estudioa prestatu dugu eta bertan ekoiztu eta grabatzen dugu, ondoren modu digitalean zabaltzeko", dio Legorburuk. Hala ere, maiztasuna finkatu ondoren, Abadetxetik zuzenean aireratzeko aukerak ere badabiltza aztertzen.

Abadetxeak ateak zabalduta, 2016an sortutako proiektua berreskuratzeko eta forma emateko aukera ikusi zutela adierazi du Duñabeitiak: "Lagunarteko zorakeria batean du sorburua Laixiar irratiak, eta beti egon da presente. Abadetxea berriro zabaltzean, sasoi bateko gogoa eta ilusioa berpiztu zitzaizkigun”. Gaineraru du herriari zabalik dagoen proiektua dela: "Librea da bere osotasunean, eta irratian parte hartu gura duenak gugana etortzea baino ez dauka". Laixiar irrati libreak izan duen feed-back-agaz pozik daude. Hainbat elkartasun mezu jaso dituztela esan dute, hainbat irrati libretatik eta Arrosa irrati saretik ere bai.

Durangaldeko albiste garrantzitsuak eta azken ordukoak Whatsapp edo Telegram bitartez jaso gura dituzu? Hauek dira bi aukerak.

WHATSAPP: Bidali ALTA 688 635 041 telefono zenbakira.

TELEGRAM: Batu zaitez @anbotokomunikabideak kanalera.