Oinezkoentzako bide berria hormigoi inprimatuzkoa da, eta dagokion argiteria izango du, Iurretako alkateak azaldu duenez. Zuhaiztiak eta jarlekuak ipiniko dituzte ibilbidean zehar, eta, arrapalen artean legarrez estalitako ibilbideak ere egokituko dituzte. "Irisgarritasuna hobetzeagaz batera, inguruan paisai-efektu positiboa lortzea" izan dute helburu, Totorikaguena argitu duenez. Proiektu guztia garatzeko 2.500 metro koadroko lurzorua bereganatu du udalak, desjabetzaren bidetik. Horrek, 30.000 euroko kostua izan du.
Proiektua martxoan onartu zuen Iurretako Udalak, hala ere, COVID-19 birusak eragindako krisiaren eraginez atzeratu egin behar izan dituzte lanak. "Aste Santuaren bueltan genuen aurreikusita lanak hastea. Hala ere, atzeratu beharrean izan gara". Lanak esleitzeko prozesuan sartuta dago orain udala. Eta, kultur etxetik eskola-eremura iristeko oinezkoentzako ibilbidea egiteko lanak urrian hasi gura dituztela azaldu du alkateak. Hiru hilabeteko epea izango du lanen ardura hartzen duen enpresak obra amaitzeko.
Herriko frontoitik ere heldu daiteke eskola-eremura. Hala ere, herritarrek gehiago erabiltzen dituzte herrigunetik hurbilago dagoen eskailera bidea, kultur etxearen atzetik doana.