Iurretako Bibliotekak Leire Bilbaoren obrari buruzko ziklo bat eskainiko du urrian zehar

Leire Bilbao idazlearen obra literarioari errepasoa egingo diote Poesiaz blai jardunaldien barruan. Durangon bizi den idazle ondarroarrak bibliografia oparoa du; azken lana Katxiporretagaz kaleratu duen Bizi-dantza disko-liburua da. 2006tik hona, gazteentzat zein helduentzat idatzi ditu liburuak, eta hauetako zenbait gaztelaniara itzuli dituzte; adibidez, Garazi Gerezi. Urte hauetan idatzitako hainbat olerki euren diskoetarako erabili dituzte hainbat abeslarik.

Jardunaldi hauek zenbait idazleren ondare kulturala ezagutzera emateko asmoz antolatu dituzte. "Literaturak busti gaitzala, gure etxeetan zein kaleetan", azaldu du Iñaki Totorikaguena alkateak. Lehenengo edizioan, Joseba Sarrionandia idazle iurretarraren obra izan zen protagonista. Iaz, ostera, Gloria Fuertes idazlearena. Ziortza Onaindia herri bibliotekako arduradunak berriro euskal idazle baten figura aukeratzea azpimarratu du: "Askotan, etxetik hurbilen duguna ez dugu aitortzen eta horixe da guk egin gura izan duguna".

Talde lana
Leire Bilbaok, bere aldetik, esker oneko berbak eduki ditu Iurretako Herri Bibliotekarentzat zein udalarentzat, eta proiektuan sortu den elkarlana azpimarratu du. Elkarlan horretatik eratorri da, besteak beste, urriaren 25ean eskainiko duten Hariak eta tantak ikuskizuna; Leire Bilbaoren poesian oinarritutako diziplina anitzetako saio honetan Bertzilla musikariak, Aritz Lasarguren dantzariak, Maite Mutuberria marrazkilariak eta Leire Bilbaok berak parte hartuko dute; saio hau helduentzat izango da. Egun berean, Peru Magdalenak Ahaztu eta jolastu tailerra gidatuko du. Ekitaldi bietarako gonbidapenak eskatu behar  dira aurrez.

Durangaldeko albiste garrantzitsuak edo azken ordukoak whatsapp bitartez jaso gura dituzu? Bidali ALTA 688 635 041 telefono zenbakira.