Mitchelton-Scott taldeko Annemiek Van Vleuten eta Amanda Spratt faborito nagusi direla, gaurtik zapatura bitartean Emakumeen Bira jokatuko da. Gaur Iurretan hasi eta amaituko den etaparekin ekingo diote 32. aldiari.
Lehenengo etapak 101 kilometro ditu. Hasi eta berehala Abadiñotik igaroko dira, 15:05 inguruan. Handik Atxondora (15:12) eta Elorriora (15:16) joango dira. Miotatik Berrizerako (15:26) bidea egingo dute ondoren. N-634 errepidean sartuta Zornotzarantza joango dira (15:50). Osten, Lezama, Derio, Artebakarra, Mungia, Astoreka eta Larrabetzutik igaro beharko dira Iurretara itzuli aurretik. Etapa 17:40 inguruan amaituko dela aurreikusi dute antolatzaileek.
Ziortza Isasi ez da irteeran izango
Bestalde, Eneritz Iturriagaren Eneicat taldea intoxikazio baten ondorioz ez da Emakumeen Biran egongo, tartean Ziortza Isasi. Sare sozialetan iragarri dutenez, taldeko txirrindulari eta kideek Burgoseko itzulian salmonelosi intoxikazio bat jasan zuten.