Taxi-Auzunea zerbitzua 2009an jarri zuen martxan Iurretako Udalak hiriguneko zerbitzuak baserri inguruetara hurbiltzeko, eta ibilgailuaren "erabilera arrazionala" sustatzeko. Astelehenetik zapatura erabili daiteke: 07:30etik 20:00etara, astelehenetik barikura, eta, zapatuetan, 09:00etatik 14:00etara. Bidaiaren prezioa bi euro dira.
Txartela berrizteko zerbitzuaren telefonora deitu behar dute erabiltzaileek, 688 618 690 telefonora. Urteak igaro ahala zerbitzua "sendotuz" joan dela dio Iñaki Totorikaguena alkateak. "Kasu askotan, auzokide askorentzat funtsezko garraioaren alternatiba bada da, ibilgailu partikularra ordezkatzen duena", gaineratu du. Abuztua kenduta, 2018an zehar 2.235 bidai egin ditu Taxi-Auzunea zerbitzuak; hilero 203 bidai, bataz bestea eginda.