Elkartasunez eta errespetuz betetako herri lasterketa, Iurretan

Markel Onaindia 2018ko ira. 20a, 18:00

Gu Be Bai Runners taldearen eskutik, IV. Herri Lasterketa Familiarra egingo dute domekan Iurretako kaleetan. Ekimenak zentzu solidarioa eduko du, eta parekidetasuna ere landuko dute. Sanmigelen atariko jaialdi bat izango da, asteburu honetan egongo diren mendi martxa, marmitako txapelketa eta Pirritx, Porrotx eta Marimototsen ikuskizunagaz batera.

Goizean izango da lasterketa. 11:00etan umeen txanda izango da, eta handik ordu erdira, helduena. Partaideek euro bat emango dute, La Otra Mirada elkarteak Senegalgo eskola bati laguntzeko duen proiekturako. Hain zuzen, elkarte honek errifa solidarioa egingo du han, eta pintxoak ere eskainiko ditu.

Anderebide emakume elkartea ere ekimenean egongo da stand bat ipinita, udalagaz eta jai batzordeagaz landutako protokoloaz informatzen. Erasorik gertatuz gero hartu beharreko neurriak tabernetako eta txonetako kideekin konpartitu dituzte. Musika ez sexistadun memoriak ere banatuko dituzte, jaietan mezu sexistak sahiesteko asmoz. 

Bestalde, 13:00etan umeentzako herri kirolak prestatuko ditu HEKI elkarteak.

 

ANBOTOKIDE izatea gure komunitatearen parte izatea da, euskararen erabilera sustatzea eta herrigintzaren aktibazioan pausoak ematea.


EGIN ZAITEZ KIDE!