Olaburuko lurpeko pasabidearen argiztapena hobetu dute

Aitziber Basauri 2018ko abu. 28a, 13:17
Olaburuko tuneleko irudi bat

Led argiekin ordezkatu dituzte Olaburuko lurpeko pasabidean zeuden 94 argiak. Espaloia argiztatzeko 55W-eko kontsumoa duten 48 led argi jarri dituzte, eta, errepidearen gainean 100W-eko 20 argi. Modu honetan, lurpeko pasabidearen argiztapena "nabarmen hobetu" gura dute, "seguruagoak" izan daitezen. Bestalde, pasabidearen irteeran eta sarreran beste sei led argi jarri dituzte.

Kontsumo elektriko murriztua erabiliz CO2 isurtze maila baxuagoa lortu gura du udalak. Led argi berriekin urteko kontsumoa %65 aurreztea aurreikusi du; urtean, 69.248 kWh aurreztuko da. Argi maila, berriz, %66,67 hobetuko da, arduradunek azaldu dutenez. Guzti horretarako 21.660 euro erabili ditu udalak.

Bestalde, pasabidearen "egoera estetikoki hobetzen" jarraitzeko bidean eta, iparraldera ematen duen horman sortzen diren ur-sartzeak murrizteko, aluminiozko egitura batekin estali da horma; aldi berean, egitura hori hainbat koloretako ohol fenolikoekin estali dute. Guztira, 300 metro karratu estali dituzte eta 39.300 euro erabili dituzte.

ANBOTOKIDE izatea gure komunitatearen parte izatea da, euskararen erabilera sustatzea eta herrigintzaren aktibazioan pausoak ematea.


EGIN ZAITEZ KIDE!