Medicus Mundi Bizkaiak Hondurasen garatu gura duen proiektua lagunduko dute

Aitziber Basauri 2017ko abe. 19a, 12:00

Iurretako Udalak Medicus Mundi Bizkaia erakundeari emango dio Garapenerako Lankidetza proiektuetarako gordetako dirua. Hondurasko Ingibuca departamentuko gazteen eta nerabeen parte-hartze komunitarioa funtsezko kate-maila da haurduntze goiztiarrak eta ama-umeen heriotza-tasa gutxitzeko katean izeneko proiektua lagunduko du udalak, 4.967,84 euroko diru-laguntzagaz

Genero ikuspegia duen proiektu honen helburua amaren eta haurraren morbimortalitatea ­—gaixotasun baten ondoriozko heriotza-tasa— gutxitzea da, udal ordezkariek azaldu dutenez. Eta baita amen eta umeen osasuna sustatzea, gazte eta nerabeen parte-hartze sozialagaz. Gizon eta emakumeen arteko berdintasunaren Sustapena eta Osasuna lankidetza arloan kokatzen da. Proiektua garatzeko 7.736 euro behar dituzte. Tokiko elkarteak %13ko ekarpena egingo du, eta Medicus Mundi Bizkaiak, %11,20koa.

Herrialde behartsuenekiko elkartasun konpromisoa mantentzea du helburu Garapenerako Lankidetza funtsak, horien garapena eta bertako baldintza sozialak hobetze aldera. 2017ko deialdira Guatemalan, Hondurasen, Senegalen, Nikaraguan eta Bolivian egin gura dituzten sei proiektu aurkeztu dira. “Gizarte interes handiena” duelakoan aukeratu dute Medicus Mundirena.

ANBOTOKIDE izatea gure komunitatearen parte izatea da, euskararen erabilera sustatzea eta herrigintzaren aktibazioan pausoak ematea.


EGIN ZAITEZ KIDE!