Urteetan asteburu bat lehenago etorri izan dira Pirritx, Porrotx eta Mari Motots Iurretara, jaien atarian. Motorrak berotzeko, egun horietan hutsik egin gabe aurkeztu dute ikuskizuna, Olaburu frontoian. Aurten, berriz, San Migel egunera arte itxaron beharko dute etxeko txikiek. Gainera, lehenengoz, Aita San Migel Plazan arituko dira, Tipa-tapa, Korrika ikuskizunagaz. Doakoa izango da, 17:00etan hasita. Euria egiten badu, Maiztegiko frontoian egingo dute.
Bertsolariek, aldiz, Olaburu frontoian jardungo dute, 22:00etan, eta ohiturari eutsiz, goi mailako bertsolariak etorriko dira dira: Amets Arzallus, Maialen Lujanbio, Alaia Martin, Igor Elortza, Jon Maia eta Unai Iturriaga. Josu Goikoetxea izango dute gai jartzaile. Aldaketa hauekin San Migel eguna “indartu” gura izan dute Jai Batzordeko kideek.