Segurtasuna eta osasuna hizpide Smurfit Kappa Nervión enpresan

Segurtasunaren eta Osasunaren 5. Astea antolatu zuen Smurfit Kappa Nervión enpresak pasadan astean, eta lan taldeari zuzendutako hainbat ponentzia eta jarduera izan zituzten. Bertan, Antonio Casimiro Almeriako Unibertsitateko irakasleak aktibazioaren eta osasunaren inguruko berbaldia eman zuen eta Vicente Fernandez Sasoiako arduradunak burmuinaren eta drogen kontsumoaren lotura aztertu zuen. 

‘Komunikatu eta seguru izan’ lemapean antolatu dute, Laneko Segurtasunaren eta Osasunaren Munduko Egunaren harira, eta osasun eta segurtasun arloan  “jokabide eta jardunbide egokiak sustatzeko ideia eta tresnak ematea” dute helburu.

Rafael Sarrionandia enpresako zuzendari orokorrak zabaldu zuen jardunaldia, pasadan astelehenean. Besteak beste, Iurretako, Zornotzako eta Durangoko udal ordezkariak, Osalaneko zuzendaria eta Industria eta Ingurumen sailetako ordezkariak egon ziren bertan.