Irakurketa gune bat prestatuko dute kalean, eta Herri Bibliotekaren bildumaren lagin bat ipiniko dute kontsultatzeko: liburuak, aldizkariak, musika, liburu irakurgailuak eta tabletak, esaterako.
Kafea eta pastak ere eskainiko dizkiete bertaratzen direnei, eta ipuin kontaketa saioa egingo dute, 11:00etan, ingelesez. Durangoko Kids & Us hizkuntza eskolaren eskutik eskainiko dute kontaketa saio hori, Dantzari plazan. Phantom Manor izenburuko saioa, 3 eta 8 urte arteko umeei zuzendurikoa, izango da entzungai.
Ikasturtean ere hainbat aldiz egiten dute liburutegiko ekintzak kalera ateratzeko apustua, Iurretan, umeentzat zein helduentzat Herri Biblioteka barruko ekintzak osatzeko. Adibidez, azken urte bietan, Liburuaren Nazioarteko Egunean, apirilean, kalera irten izan dira.
Udako ordutegia
Ekain amaieratik, ordutegi bereziagaz dabiltza Iurretako Herri Bibliotekan, eta, irailaren 4ra arte, goizez baino ez da egongo zabalik liburutegia; 08:30etik 13:30era, hain zuzen. Sasoi honetan oporrak hartzen dituztenentzat, bestalde, maileguak uda guztirako egiteko aukera ere eskaintzen dute Iurretan.