Urteak daramatzate Furundarenak (Ordizia, Gipuzkoa, 1970) eta Mendizabalek (Zestoa, Gipuzkoa, 1973) elkarrekin jotzen, eta elkarlan horren emaitza da Arnasak izenburuko ikuskizuna. Egileen berbetan, “sosegutik, poztasunetik, hausnarketatik eta dantzaren tradiziotik sortutako musika berri eta garaikidea” da Iurretan eskainiko dutena. Euskal musika tradizioko kantak eskainiko dituzte, baina tangoari eta Eskoziako musikari ere keinua egingo diote emanaldian.
Azaroaren 21ean, bestalde, Euskadi Brass taldeak eskainiko ditu emanaldi bi. Goizean, 11:30etatik aurrera, Maiztegi ikastetxeko ikasleek emanaldi didaktikoaz gozatu ahalko dute Ibarretxe kultur etxean. Felipe y los siete mortíferos izeneko ikuskizuna eskainiko diete Iurretako umeei; tronboia, biolontxeloa eta narratzaile baten ahotsa uztartzen ditu ikuskizun horrek. Egun berean, eta aurtengo Musikaldiaren zikloari amaiera emateko, 20:00etan, publiko orokorrari zuzenduriko emanaldia ere eskainiko du Euskadi Brass taldeak, Aita San Migel elizan.