Maiztegi Herri Eskolan eskaintzen diren eskolaz kanpoko kirol jarduerekin erakustaldiak eskainiko dituzte gaur eta bihar eskolako gaztetxoek (Lehen Hezkuntzakoek).
Gaur, 17:00etatik aurrera, patinajea, ninjitsu eta herri kirolen (giza proba, txinga eroatea…) erakustaldiak egongo dira. Ondoren, jardunaldiei kultur ukitua emanda, euskal dantzak erakutsiko dituzte Maiztegiko gazteek.
Zapatuan, 09:45ean, krosa praktikatuko dute. Aurten ez dira errepideko asfaltora arte joango, eta eskolako belardi bat aprobetxatuko dute zirkuitua osatzeko. Ondoren, 11:00etan, futbito eta saskibaloi partiduak hasiko dira. Guraso elkarteak edariak eta pintxoak salgai ipiniko ditu egun osoan.