Garaiko Udalak komun publikoa atondu du herrian. San Migel aldean ipini du, txintxaunen ondoan, kokalekua erabilgarria eta irisgarria izateaz gainera, ura eta estolderia instalazioetarako egokia ere badelako. 73.000 euroko inbertsioa egin du guztira, eta Bizkaiko Foru Aldundiaren laguntza izan du (50.500 euro).
Udalak adierazi du proiektua 2025eko aurrekontuak eztabaidatzeko prozesuan sortu zela, "Herriko Taldeak proposatu ostean, udalean ordezkaritza duten bi taldeek (EAJk eta Herriko Taldeak) komun publiko baten bideragarritasunari buruzko txostena egiteko asmoz, 5.430 euroko diru-zuzkidura" aurreikusi zutenean. Era berean, obrak beste zeregin bat egiteko ere baliatu dituzte: komun publikoa ipintzeaz gainera, sute-ahoak ere instalatu dituzte eremuan
Txintxaunak estaltzeko asmoa
Jolas parkearen eremu horretan beste jarduketa bat egitea ere aurreikusi du udalak. Txintxaunak estaliko ditu umeek jolas-eremua urte osoan erabili dezaten. Beroaldien ondorioak arintzeko helburuz, "irla klimatikoa" eraikiko dutela esan dute.