Garaiko Udalak berbaldi informatiboa antolatu du eskuartean daukan hirigintza plan berria (HAPO Hiri Antolamendurako Plan Orokorra) herritarrei aurkezteko. Zehatz esanda, plan orokor berriaren aurrerapena da azalduko dutena. Prozesu osoa herritarren partaidetzagaz egiten dabiltza, eta planaren erredakzio-taldea arduratuko da planaren aurrerapena jendaurrean azaltzeaz. Berbaldia astelehenean izango da, apirilak 7, 18:00etan, udaletxean. Behin jardunaldia amaituta, herritarrek bilerak egiteko aukera izango dute erredakzio-taldeko kideekin, zalantzak argitzeko zein proposamenak egiteko. Batzar horiek aurrez aurre zein era telematikoan egin ahalko dituzte Horrez gainera, udalak idatzi bat banatuko du etxerik etxe, plan orokorraren prozesuaren berri emateko.
Etorkizuneko Garai planifikatzeko tresna
Udalak gogoratu duenez, hirigintza plana udalerriko lurren etorkizuna, horien erabilera posibleak eta eraikuntza-intentsitatea antolatzeko tresna da, horiek guztiak arautzea ahalbidetzen duena. Lurren sailkapena eta kalifikazioa zehazten dira bertan, besteak beste. Hori guztia dela eta, plana udalerriaren etorkizunerako tresna inportantea denez gero, udalak garrantzitsutzat jo du herritarrak bilerara bertaratzea.
Era berean, udalak gogora ekarri du urtarrileko osoko bilkuran, udalbatzako alderdi biek, EAJk eta Herriko Taldeak, aho batez onartu zutela Plan Orokor berriaren aurrerapena, eta hura herritarrei aurrez aurre azaltzea.