Udalak auto elektrikoak kargatzeko gune bat atondu gura du herrigunean. Osaren esanetan, umeentzako txintxaunak dauden eremuaren ondoan atonduko litzateke gunea, ondoko partzela batean. Oraindino ez dute data zehatzik finkatu instalazioa egiteko, baina aurten egingo dela aurreratu du alkateak.
Gune hori egiteak beste mugarri bat ipiniko du Garaiko Udalak jasangarritasunaren alde hartutako bidean. Gune berriak gas emisioak gutxitzeko tresna bat eskainiko du. "Klima aldaketari buruz gabiltzanean, badirudi kanpora begira ari garela. Iruditzen zait gure zilborrari begiratu behar diogula, esanez, zer egin dezakegu guk? Txikitik bada ere, egin dezakegun hainbat gauza dago emisioak murrizteko edo ingurumen kalteak konpontzeko", azaldu du Osak. "Guk geuk hartu behar ditugu halako erabaki txikiak. Horrek aukera ematen diela besteei txipa aldatzen laguntzeko? Bada, primeran", gehitu du.