Herriko jaietan zein udalekuetan osasun-neurriak bermatzea ezinezkoa dela iritzita, Garaiko Udalak gazteei zuzendutako udalekuak eta herriko jaiak bertan behera uztea erabaki du. "Distantzia fisikoa gordetzea, ekitaldietara hurreratzen diren pertsonen kopurua zaintzea eta garbitasuna mantentzea bermatu ezin diren irizpideak" direla baloratu du udalak, "are gehiago udalerri txiki eta, bitartekoen aldetik, urri dabilen batentzat". Horrela, "pena handiz", umeei eta gazteei zuzendutako udalekuak eta herriko jaiak (uztailaren 25etik 31ra bitartean ospatzekoak ziren) bertan behera uztea erabaki du.
Bideragarritasun txostena
Garaiko udalbatza ekainaren 15eko osoko bilkuran batu zen. Bertan, aurrerantzean hartu beharreko berehalako neurriei buruzko txostena onartu zuten, Erramun Osa alkatearen proposamenez. Txostenak, jarduera ekonomikoa berreskuratzeko orientabideak, eta, diru-bilketaren jaitsieraren ondorioz, Garaiko Udalaren bideragarritasun ekonomikoa bermatzeko irizpideak jasotzen ditu.
Udalak azaldu duenez, uneotako kezka eta lehentasun nagusia herritarren osasuna zaintzea da.