Garaiko Udalak azaldu du txintxaunetako batzuk usteldu, hondatu eta makaldu egin direla denboraren poderioz. Eremuaren azpiko lurrari buruz ere, beste horrenbeste gertatu dela azaldu du. "Duela hamabi bat urte ipini zen gomazko lurra ere ez dago oso egoera onean, lurraren zatirik handiena askatu egin baita, xaflen arteko tartea handitu da eta, horregatik, ingurua arriskutsua izan daiteke umeentzat erabiliz gero". Arrazoi horiek guztiak tarteko, berriztatze lanak martxan ipini ditu udalak.
Hondatuta dauden txintxaun zatien ordez, berriak ipiniko dituzte. Eremuaren zorua berriztatu eta gomazko lur berria ipiniko da, "gaur egunean indarrean dagoen araudia" bete eta umeen segurtasuna ahalbidetze aldera. Umeen jolas eremura animaliak-eta sar ez daitezen, koloretako itxitura bat ipiniko dute. Azkenik, eremua "sendo" garbituko duela azaldu du udalak.