Boluda Kabaretak umorea, magia eta zirkua ekarriko ditu Garaiko plazara

Garaiko aurtengo jaietako nobedade nagusietariko bat Boluda Kabareta izango da. Umorea, magia eta zirkua ekarriko ditu herriko plazara, uztailaren 25ean. 21:00etan hasiko da ikuskizuna. Cecilia Paganiniren konpainiak Plateruena kafe antzokian eskaintzen duen La Noche Boluda ekimenean oinarrituta, ikuskizunak hainbat partaide izango ditu. 

Cecilia Paganini argentinarra Iurretan bizi da, eta bertan ekainean antolatutako Plazaratu Astean ere taularatu zuen Boluda Kabareta. Kasu honetan, Garaiko plaza izango da artisten elkargunea. Gorka Ganso clownak egingo ditu aurkezle lanak, eta Paganinik gorpuztuko duen Amparito pertsonaiak ikusleen barre algarak ateratzeko asmoa izango du ikuskizunean zehar.

Ituiñoren magia

Kabaretean parte hartuko duen artista ezagunetariko bat Imanol Ituiño magoa izango da. Bilbotarrak Euskal Herriko hainbat plazatan erakutsi izan du bere lana. Iñigo Arroyo Barakaldotik etorriko da, bizikleta gainean akrobaziak eta itzulipurdiak egiteko. Sara Sarinik eta Cia Orainbik zirku modalitateak erakutsiko dituzte, Paganinik iragarri duenez.

Garaiko artistak ere bai

Bestalde, aipagarria da Garaiko zenbait lagunek ere parte hartuko dutela kabaretean. Esaterako, dantzariek euren ekarpena egingo dute. Gainera, Koro Benito poeta ere badago Paganiniren gonbidatuen artean.

Horretaz guztiaz gainera, musika egongo dela azaldu du Boluda Kabaretaren antolatzaileak.

Durangaldeko albiste garrantzitsuak edo azken ordukoak whatsapp bitartez jaso gura dituzu? Bidali ALTA 688 635 041 telefono zenbakira.