Gainera, Durangaldeko hiru baserritarrek bertako jakiak ere eskainiko dituzte: gazta, txakolina, sagardoa, baserriko ogia eta euskal pastela. Guztira, 27 produktorek parte hartuko dute etziko azokan. Lore enpresak 17 izango dira eta lanabesenak, 2; horiez aparte, loreak eta egurra uztartzen dituen artisau bat eta aurrez aipatutako hiru baserritarrak ere egongo dira.
Kontsigna eskura
Erosketak egiten dituzten herritarrek kontsigna bat edukiko dute eskura, herritik jai giroan lasai ibili ahal izateko. Antolatzaileek laguntzaileak ipiniko dituzte gauzak kontsignara eramateko.
Garaiko Udalak, Urkiola Landa Garapeneko Alkarteak eta Trumoi-tte kultur elkarteak antolatzen dute azoka, herriko nagusien eta hainbat boluntarioren laguntzagaz.