Aurtengo urtarrilean Leopoldo Gutierrez Zubiaurre hil zen, Garaiko Zubiaurre artisten familiaren kideetako bat, Pilar Zubiaurre idazle eta feminista zenaren semea, hain zuzen ere. Bera ere intelektual lez ulertu izan dute askok, injineru eta ekonomialari izateaz aparte. Mexikon bizi zen, eta egunotan Garaira etorri dira Gutierrezen seme-alabak, bere errautsak ekartzera; asteburuan ekitaldi xume bat egingo dute.
Pilarren aita, Valentin, musikari ezaguna izan zen. Neba bi ere eduki zituen, Ramon eta Valentin, margolari ezagunak zirenak. Senarra, aldiz, Ricardo Gutierrez kritikaria izan zen. Gerra sasoian egin zuten ihes.
Domekako ekitaldia 10:15ean hasiko da Garaiko udalak eta dantzariek elizako atarian eskainiko dioten omenaldiarekin. 10:30ean, hileta meza izango da eta ostean, Garaiko hilerrian errautsak hobiratuko dituzte.