Elorrio goi mailako pilotaren agertoki bihurtuko da domekan, uztailaren 5ean. Plazako frontoian Emakume Master Cup-eko Udako Master Laboral Kutxa Txapelketako jardunaldi bat jokatuko da 12:30etik aurrera. Euria eginez gero, ekimena udal kiroldegiko pilotalekura lekualdatuko da.
Promesa mailan, Benito-Berasaluze eta Uriarte-Galardi bikoteak lehiatuko dira; Elite mailan, berriz, Ruiz de Infante-Bergara eta Arrizabalaga-Zabala izango dira aurrez aurre. "Txapelketak goi-mailako ikuskizunaz gozatzeko aukera eskainiko du, eta, aldi berean, emakumeen pilota sustatzen eta haren ikusgarritasuna indartzen lagunduko du", adierazi dute udaletik ohar batean.