Ospakizunerako urtea duzue aurtengoa. Zelan ospatuko duzue mendeurrena?
Hile birik behin erosketa-gurditxoak zozkatutako ditugu, urterreneko tote-bag-ak atera ditugu, egutegi berezia kaleratu dugu... Irailean, zozketa handiagoa egingo dugu. Orduan izango zen Pedro Sagastizabalen urteguna, eta hori kontuan hartuta ospatuko dugu mendeurrena. Argazki erakusketa bat ere prestatu gura dugu.
Sagastizabal familiakoa izan ez arren, umetatik duzu lotura dendagaz.
Bai. Bost urtegaz hasi nintzen enkarguak egiten, Pedroren alaba Doloresentzat. Egunero etortzen nintzen, eguerdietan eta arratsaldeetan. Ogi bila joaten nintzen, aurrezki-libreta eguneratzera... Dendan 14 urtegaz hasi nintzen lanean. Bizi osoa daramat denda honetan. Pedro Sagastizabalen langile izan nintzen lehenengo; gero, Dolores alabak hartu zuen negozioa. Jubilatu zenean, Jesus Mari Sagastizabalegaz —Pedroren seme gazteena— batera hartu nuen negozioa, bion artean.
Denerik saldu duzue bertan.
Bai. Garai batean, abarketak, bonbatxoak, lanerako alkandorak, barruko arropa... saltzen genituen. Baserrirako antzinako erremintak eta maletak ere bai. Burdindegia ere izan dugu; lan asko egin dugu lantegiekin. Denda hau zabaldu zenean ez zegoen saltoki handirik. Sasoi bateko saltoki handia zen hau. Fruta eta bakailaoa ere saldu dugu, eta kafe-bihia ehotzen genuen. Oraindino giltzen kopiak ere egiten ditugu; Internet bidez ezin da horrelakorik egin, oraingoz behintzat (barrez).
Honelako denda gutxi dago gaur egun.
Bai, Elorrion bakarrak gara. Gu ere adinean aurrera goaz, eta atzetik ez dator inor.
Urte hauetan guztietan asko aldatu da lan egiteko modua.
Itzelean! Hilean ordaintzeko hainbat fxitategi genuen, eta kontu guztiak eskuz egiten genituen. Oraindino ere kuadernoa erabiltzen dut. Bestalde, erosketa etxera eraman dugu beti; gaur egun ere bai. Garai batean lez jarraitzen dugu lanean. Baina, gazteen kontsumo ohiturak beste era batekoak dira.
Ez da erraza denda bat ehun urtean zabalik mantentzea.
Dolores oso profesional ona zen, oso gertukoa. Gogoratzen dut, pastelak egiteko kazolak saltzen zituenean, errezetak ere ematen zizkiela bezeroei. Premia zutenei lagundu egiten zien, eta geroago ordaintzeko aukera eskaintzen zuen. Oso hartu-eman gertukoa zuen bezeroekin. Behin jubilatuta, dendara etortzen zenean ere bezeroekin egotea gustatzen zitzaion. Esku ona zuen bezeroekin. Horrela jarraitzen ahalegindu gara. Bestalde, familia negozioa mantentzeko prest egon dira belaunaldi berriak.
Zuretzat zer da denda hau?
Dena. Hainbat arlotako ikastaroak egin ditut: erakusleiho-apainketa ikastaroak, paketeria.... Gustuko dut nire lana eta aurrera egiteko aukera izan dut. Dendan sartzen den jendeagaz hartu-eman hori izatea gustatzen zait. Pena emango dit denda ixtea. Helduko da horretarako momentua, eta atzetik ez dator inor lekukoa hartzeko. Dena dela, inork hartuko balu garai berrietara egokitu beharko luke.