Gaur hasiko da Erdellaren Mendi Astea, Eñaut Aiartzaguena iurretarraren berbaldiagaz; Carros de Foc ibilbideko margoak aletuko ditu. Aiartzaguenaren lanak Iturri kultur etxean egongo dira ikusgai, gainera, azaroaren 29ra arte. Koke Lasak Nepal zeharkatzen duen ibilaldiari buruz berba egingo du martitzenean. Eguaztenean, Gontzal Murgoitio elorriarrak mendi lasterketei buruz hitz egingo du, gaztetxean. Eguenean, ostera, Ainhize Belar atxondarra 9a+ graduko igoeren sekretuei buruz jardungo da.
Amaitzeko, Erdellaren urteko asanblada egingo dute barikuan, 18:00etan, kirol etxean. Elkartera hurbiltzeko deia egin diete Erdellako kideek elorriarrei. "Ekarri zure iritziak, zure galderak eta egitasmoak eta gozatu mendiak gurekin batera".