“Kantak naturaltasunez konposatu ditugu; ahotsak gehitzea azken prozesua izan da, gehien kostatu zaiguna”

'Beratu' Ateneon aurkeztuko duzue. Gogotsu?
Bai, oso gogotsu. Urte dezente pasatu da azken kontzertua eman genuenetik eta zuzenean jotzeko oso gogotsu gaude, aspalditik. Gainera, hirukote formatuan zuzenean zelan moldatzen garen ikusi gura dugu. Urduri ere bagaude, jakina.

Hirukote lez jarraituko duzuela iragarri zenuten orain denbora bat. Zelakoa izan da trantsizioa? Asko kostatu zaizue erabakia hartzea ala naturala izan da?
Zazpi urte pasatu dira gure lehenengo lana aurkeztu genuenetik. Hainbat kontzertu jo eta gero, Nerea Lersundik taldea utzi zuen. 

Musikalki konposatzen jarraitu genuen, ahotsean laugarren taldekide bat izango genuen ilusioagaz, baina urteak pasatu ahala eta hainbat lagunekin ahalegindu eta gero, hirukote lez aurrera egitea erabaki genuen.

Ideia musikal guztiak kanta bihurtzea eta grabatzea izan da gure erronka, ahotsa gure gain hartuta.

Zergaitik ipini diozue 'Beratu' izena diskoari?
Diskoko kantak aspaldiko ideia musikalak dira, eta, beraz, urte hauetan guztietan kantak beratzen egon direla esan genezake. Hortik dator diskoaren izenburua.

Abestietariko batean Nereak abesten du. Abesti zaharra da?
Ez da beragaz landuta geneukan abesti zahar bat. Grabazio prozesua martxan zela, kanta batzuetan korua egitera edo bigarren ahotsetan parte hartzera animatu zen. Diskoaren diseinuagaz ere asko lagundu digu.

Oso lan freskoa eta desberdina iruditu zait, esperimentalagoa edo. Horrela da?
Ez dugu intentzio berezirik ipini konposizioan. Musikalki, kantak naturaltasunez konposatzen joan gara. Ahotsak gehitzea azken prozesua izan da, gehien kostatu zaiguna izan dela esango nuke.

Non grabatu duzue? Diskoa formatu fisikoan kaleratu duzue?
2021eko ekainean grabatu genuen, entsegu lokalean, eta nahasketak abenduko azken egunetan egin genituen. Prozesu guztia etxekoen artean eta gure baliabideak erabilita egin dugu. Teknikari lanean, Migel Alonso aritu da. 

Hasieran, disko digitalean bakarrik kaleratzea pentsatu genuen, baina, azkenean, formatu fisikoan ere kaleratuko dugu, Bonberenea Ekintzak-en eskutik.

Ateneoko kontzertuaz gainera, Tolosan ere egongo zarete.
Bai, Bonberenea Ekintzak-ek 20 urte betetzen ditu eta denbora honetan guztian argitaratu dituzten talde batzuekin ospakizun jaialdia antolatu dute. 14-15 taldek joko dugu eta eszenatoki bitan banatuko da jaialdia. Talde bakoitza ordu erdiz arituko da. Ekainaren 4an izango da, Bonberenea gaztetxean.

Beste nonbait?
Oraingoz, data bi horiek baino ez ditugu lotu.