Aurkezpen ekitaldian, 22. Korrikan parte hartzearen garrantzia azpimarratu zuen Mugikak "eta, zelan ez, behin Korrikan parte hartuta euskaraz parte hartzea".
Gainera, AEK-ko kideak jakinarazi zuen aukera asko dagoela Korrikan parte hartzeko: kilometroa, petoak zein Korrikako arropa erosita. Dagoeneko materiala euskaltegian dagoela azaldu zuen.
Jesus Guridi Elorrioko Udaleko zinegotziak adierazi zuen Elorriok bat egiten duela Korrikagaz, ekitaldiaren leloagaz eta Korrikak bultzatzen duen berba bakoitzagaz. "Lozorroan daramatzagu azken hiru urteak, aktibatzeko ordua da. Edo aktibatzen gara edo gureak egin du. Rock & Roll apur bat jotzeko ordua da", jarraitu zuen Guridik.
Bestalde, "edo denok batera" egiten dugula edo bestela "nekez egingo" dugula aurrera gaineratu zuen Mugikak. Horregaitik, 22. Korrikan parte hartzeko deia egin zieten elorriarrei.