Roberto Mendibilek (Elorrio, 1969) iaz amaitutako bide beretik hasi du denboraldia. Joan zen asteburuan, Espainiako trail txapelketako lehenengo proba irabazi zuen Morcin herrian (Oviedo), 1980. urtea baino lehenagoko motorren mailan. Sasoian aurkitzen da eta helburu argia du: iazko txapela berritzea. Orain arte birritan irabazi du Espainiako kopa.
Bi egunetan banatutako proba oso parekatua izan zen puntuei dagokionez, baina Mendibilek aurkariek baino penalizazio gutxiago jaso zituen hankak lurrean jartzeagatik eta hor atera zuen aldea.
Beraz, lider moduan lehiatuko du kopako bigarren proba urriko lehenengo asteburuan, Madrilen. Horren ostean beste hitzordu bi geratuko dira: azaroaren erdian Siguenzan (Guadalajara), eta abenduko lehen asteburuan Kordoban (Andaluzia). Bultaco sherpa motor batekin aritzen da.