Leteren omenezko 'Loreak eta zauriak' diziplina arteko ikuskizuna Elorrion

Bertsoz, kantuz eta musikaz osaturiko diziplina arteko emanaldia da Loreak eta zauriak. Xabier Lete omentzea da ikuskizunaren helburua, baina bere kantuak gogoratzeaz haratago, Leteren kanten eta melodien bitartez gaur egungo gizarteari begiratzen dion proposamena da. Hainbat bidaia proposatzen du gainera, 70eko hamarkadatik 2020ra, bizitzatik heriotzera, eta ni-tik gu-ra, besteak beste.

Emanaldian Xabier San Sebastianek (ahotsa eta gitarra), Joserra Senperenak (pianoa), Quico Pugések (biolontxeloa) eta Beñat Gaztelumendik (bertsoak) parte hartzen dute.

Musikaire
Ikuskizuna zapatuan izango da, hilak 17, 20:00etan, Ganondo parkean. Ez da izango Musikaire jaialdiaren barruan asteburuan egingo den emanaldi bakarra. Gaur, barikua, Juanma Urriza 5tet taldeak Hertzainak taldearen doinuetan oinarrituriko abestiak joko ditu. Domekan, Paul San Martinek kontzertua eskainiko du.

Durangaldeko albiste garrantzitsuak eta azken ordukoak Whatsapp edo Telegram bitartez jaso gura dituzu? Hauek dira bi aukerak.

WHATSAPP: Bidali ALTA 688 635 041 telefono zenbakira.

TELEGRAM: Batu zaitez @anbotokomunikabideak kanalera.