Egoerarik errazena izan ez arren, Arriolak Jazz Blues jaialdiari eustea erabaki du. Gaur abiatuko da XXXI. edizioa, Juanma Urriza bateria-jotzaile eta konpositore nafarraren kontzertuagaz; lauko formatuan etorriko da Elorriora. Urrizak Mamel lana aurkeztuko du. Musikari legez, zenbait estilo eta doinutara moldatzeko erraztasuna erakutsi du bere ibilbidean zehar, hasi jazzetik, eta pop-rock, ska eta flamenkora. Urrizak goi mailako jazz ikasketak egin ditu Musikenen.
Bestalde, zapatuan blues doinuek hartuko dute Arriola. Estatuko bluesman-ik ospatsuenetariko bi igoko dira bertako agertokira, Tonky de la Peña eta Ñaco Goñi. De la Peña eta Goñi 1984an elkartu ziren lehenengoz, eta ordutik hona bizirik eutsi diote bluesaren garrari.
Emanaldi biak 19:00etan hasiko dira eta sarrerak hamar euroan erosi ahalko dira.