Elorrixoko Kale Katuak elkarteko kideek salatu dutenez, Elorrioko Ibaiondo kalean katuei jaten emateko jarri duten txabola apurtu dute. Herrian lau puntutan katuei jaten ematen diete, koloniak kontrolatu eta zaintzeko.
Katuen koloniak kontrol barik hazten joan diren heinean, elkarbizitza arazoak sortu izan dira Elorrion, eta arazo horiek konpontzeko, elkarteak eta udalak elkarlanean ekimenak martxan ipini dituzte. Horietako bat, katuei jaten emateko leku hauek jartzea izan da. Txabola hauek elkarteak kudeatzen ditu. Txartel baten bidez baimenduriko elkarteko kideek bakarrik ematen diete jaten katuei.