Artisau eta sortzaileen azoka egingo dute uztailaren 5ean Elorrion

Uztailaren 5ean artisau eta sortzaileen laugarren azoka egingo dute Elorrion, Urarka kalean. Antolatzaileek jakitera eman dutenez, segurtasun neurriak hartuta egingo dute aurtengo edizioa. 

Eixu elkarteak antolatzen duen azokaren laugarren edizioa egingo dute aurten. Urarka kalean egingo duten azokan 23 sortzailek parte hartuko dute. Antolatzaileek jakitera eman dutenez, karpatik karpara 3 metroko segurtasun tartea egongo da, eta gainera saltzaileek maskarak erabiliko dituzte. Horrez gain, postu bakoitzean eskuak garbitzeko hidrogela egongo da. 

Azokaz gain, Itziar Gamero Elorrioko ipuinkontalariaren saioaz gozatzeko aukera ere egongo da. Bi saio eskainiko ditu Gamerok. Lehenengoa 11:00etan izango da, eta bigarrena 12:30ean. 

Durangaldeko albiste garrantzitsuak edo azken ordukoak whatsapp bitartez jaso gura dituzu? Bidali ALTA 688 635 041 telefono zenbakira.