Lehenengo uzta jazo berri duzue.
Karlos Eriz: Bai. Azken urte bietan, probak egiten ibili gara kamera txiki bategaz, 100 bat burugaz. Leartikerren laguntzagaz eman ditugu pauso guztiak. Iñaki Uriberen ezinbesteko laguntza ere eskertu beharrean gaude.
Xabier Iñarrairaegi: Oso ezaguna da Las Pedroñerasko (Cuenca) berakatz moreagaz egindako berakatz beltza. Baina argi genuen bertako ekoizleekin lan egingo genuela, eta Nafarroako berakatza erabili dugu; aurten, Kanpezuko ekoizle bategaz egin dugu tratua.
Gaztela-Mantxako eta Andaluziako berakatz beltza oso ezaguna da. Euskal Herrian lehenengoak gara gu.
Nola lortzen duzue berakatz beltza?
X. I.: Berakatz freskoaren heltze edo zahartze prozesu baten ondorioz. Lehen uzta lortzeko, 51 egunetan izan dugu berakatza kameretan, 70 bat gradutan, eta %80- 90eko hezetasun mailagaz.
K. E.: Hartzidura natural baten ostetik lortzen dugu. Kameratik aterata, 20 bat egun utzi behar da, ontziratu aurretik.
Harrera ona du?
K.E.:Horren zain gaude, produktu ezezaguna delako. Gastronomian eta kirol munduan ezagutzen dute gehien. Osasuntsua delako erosten dute batzuek; berakatz freskoaren propietateak bikoizten ditu berakatz beltzak.
X.I.: Antioxidatzailea eta energia iturri naturala da, eta kolesterola eta triglizeridoak murrizten laguntzen du, besteak beste.
Nolako zaporea du?
K.E.: Erregaliz antzekoa. Berakatzaren arabera, garratzagoa edo gozoagoa izan liteke. Ez du garraztasunik, ez dator behin eta berriro ahora, eta ez du hatsik uzten. Erabilera asko ditu: okelagaz, arrainagaz, entsaladan... Hori bai, neurrian bota behar da .
X.I.: Gozogintzan ere asko erabiltzen da, edo garagardoa egiteko.